بما اني من زمان ما نزلت موضوع من ابداعي الشخصي حبيت اني اجي بجديد لقسمي خصوصاً
ولاحلى اعضاء عموماً
وبناءً على ذلك
حبيت اطرح عليكم تشكيله منوعه من ايام طفولتي البريئه وان شاء الله تعجبكم
<< الله يجيب البراءه
بيت جدي :
الللللللله يذكر ذيك الايام بالخير ..
* كنت انا واخوي وخالتي دايم مع بعض كانت ايام كمبيوتر العائله وحنا ماسكين طابور نبي نلعب الضحك كله لما تخلص خالتي وتمل من اللعب ( ماريو- الفطر ) تقول خلاص ترا المحول حار بعدين بينفجر عليكم وحنا اللي ما نكذب خبر ندز على طوول للفريزر ونحط الكمبيوتر والمحول لين يثلج .
*وليد ولد خالتي امه مدلعته دلع العالمين كل شي تشتريه له ما خلت شي ما شتره له مسدس لعبه مويه ماقد شفت مثله الى الحين وسياره شحن وغرفه نوم على شكل سياره كل شي مرررررررره المهم نجي لكل هديه بالتفصيل :
- مسدس المويه :
كان عليه قوه دفعه خياليه يكفي انه يشتغل بالشحن تشحن البطاريه وبعدين شف قوة الدفع وشلون الزبده اني قدرت العب على ولد خالتي بالموت اني اصير انا الصياد وهم الوحوش عشان اصيدهم بس كنت ابي اطلق بالمسدس المهم اخذت المسدس ونحاشوا يبوني الحقهم انا بس حدي يوم شفتهم موب حولي وانا اللي ارش مويه على بيت الجيران وعلى غرفة خالتي وعلى الشجر وساحب على الوحوش
مادريت الا وليد جاني هاوشني وسحب مني السلاح + الذخيره - سيارة الشحن :
اذكرها الى الحين جيب ازرق وفيه صندوق ورا اخوي وولد خالتي ساحبين علي ما يبون يركبوني كل ما قلت لهم بركب قالو ما فيه مكان ما يكفي الا 2 بس اقولهم ابي اركب ورا عيو علي يقولون لا تخرب السياره
كانت ذيك الايام عيد الاضحى وانا اللي تطري على بالي فكره عشان اركب ودي اركب مرررررره ما يخلوني قلت لهم يله انا بسوي نفسي خروف وركبوني ورا على طول قالو وافقوا وانا اللي اطمر ورا والمشكله اذا جلست عادي يقولون لا خلك مثل الخروف : S . تباً لهم ومخليني حيوان عشان اركب خخخخخخخخخخخخخ
- غرفة نوم على شكل سياره:
هذي الغرفه ما ادري وشلون قايله السرير على شكل سياره والدولاب على شكل سياره وكانت مساكه الدولاب على شكل دركسون عاد ولد خالتي يجلس على السرير وحنا وراه يقاله ابونا يمشينا عاد انا قلت له مره بسوق بغى يسطرني نزلت من السرير ورحت للدولاب ومسكت المساكه وقعدت اسوي نفسي اسوق المشكله ما فيه شي يدل على انك راكب سياره خخخخخخخخ
واقف وماسك دركسون << عليك سواقه
=================
* كنت انا على قولتهم دلوع جدي
كل عيال خالتي واخواني ينادون جدي ( بابا جدو ) الا انا ( بابا ططو)
فمسكو علي هالعياره ( طــطـو ) الى يومنا الحاضر
عيال خالتي اذا بغوا شي من جدي راحو لمي وقالو لي قل لجدي كذا او سو كذا
مره من المرات كان جدي طالع الصبح يشتري اغراض للبيت فاستغلوا عيال خالتي الفرصه وقالو عبدالله تعال خلنا ندخل الملحق ( كل شي عند جدي الا الملحق ياويل اللي يجيه ) عاد حنا دخلنا وجبنا الطراحات وسويناها على شكل بيوت وقعدنا نلعب وحنا مبسوطين مره الا دخل جدي علينا اول ما شفنا عصب وقعد يهاوش كل عيال خالتي يناظروني ينتظرون مني لحظه الفرج ، أي فرج يرحم والدينكم جا جدي قفل باب الملحق علينا والله العظيم اني ماأنساها محطنا تمحيط بالسلسله طقنا طق خرافي وعلى طول صحنا
لما جا وقت الغدا جا جدي ناداني (ططو وليدي تعال الغدا ) وانا مسوي نفسي زعلان ما ارد عليه جا لمي وقالي تعال تغدا وش فيك قلت له ما احبك قال ليش قلت عشانك طقيتني قالي ايه لاتجون شي موب لكم وحبني وانا اللي ارضى على طول ورحت جلست جمبه ويغديني .
================
بيت عماني :
كانو عمي براهيم وعمي سلطان ساكنين في بيت واحد كانت وناسه لما نجي، الا انا اول ما يقولون اهلي بنروح بيت عمانكم يضيق صدري ليش ؟
انا اقولكم ليش
وحده من بنات عمي كبيره اول ما تشوفني على طول تخمني وانواع الحبحبه والتجغيف من اجي لين اروح وهي ماسكتني حرمتني براءه الطفوله
<< مره ثانيه الله يجيب البراءه
انا ذيك الايام اهلي مستقدميني بفيزة انسان المهنه ولد
قصدي ذيك الايام لما كنا بنلعب تجي بنت عمي الله يذكرها بالخير وتلعب معنا عاد اذكر مره كنا نلعب لعبه ( انا الذيب باكلكم ..انا الام بحميكم ) المهم طلع علي دور الذيب ولازم الحق عيال وبنات عمي جت بنت عمي الكبيره وقالت تعال اجلس هنا انا الاحقهم عنك عشان ماتتعب :S
وووين وش هاللعب وشوله انا صاير بزر ذيك الايام الا عشان العب وانبسط لو اني ادري كان قلت لاهلي ابي اصير كبير اول ما تجيبوني
واذا كنا بنرجع البيت خلاص احسد اخوي اذا ركب السياره لانه يركب محد طاقن له خبر الا ولد عمي عشوق ( ماجد كلم ابوك عشان تنام عندنا ولا كلم ابوي عشان انام عندكم ) خخخخخخخخخخخخخ عكسي انا اذا كنت بطلع من بيت عماني تجي بنت عمي الكبيره (عمي خالد عمي خالد ) اصبر شوي تمسكني وتحبحب فيني وتعضعضني وانا اناظر اهلي في السياره وانا اقول في نفسي ياحلاة من ركب معكم ياحظكم بس . ياحبي لها والله
كانت بنت عمي اللي كبري ياحليلها والله ( بربربربربربر ) ميب تسكت ابد عكس اختها اللي اكبر منها ما تسولف كثير اذكر مره بنت عمي اللي كبري كانت تسولف معي في الفجر المهم اذن الفجر وكان المؤذن اول ما يخلص اذان يدق الجرس على البيوت اللي حول المسجد عاد انا ما كنت ادري عن هالشي وكانت بنت عمي بربربربربربربربربر اول ما دق الجرس انا وجهي تغير وهي تسولف قالت عادي هذا المؤذن وبربربربر كملت السالفه ولاكأنه صار شي خخخخخخخخخخخخخخخخ
كانت بنت عمي هذي صديقتي مرررررره كنا نلعب مع بعض دايم وكنت دااااااايم اناديها وتجي اختها اللي اكبر منها ( عبدالله نادني اقولها لا بس فلانه ) تقولي ليش ؟ اقولها صديقتي المهم انها قالت لي قبل فتره كنا نسولف عن هالسالفه قالت تصدق اني اكرهك من زمان اقولك نادني وتقولي لا كنت اغار من اختي خخخخخخخخخخخخخخخخخخخخ ...
وبس هذي اجمل ذكرياتي اللي جت على بالي في الوقت الحالي ..
طفولتي .. 
