%% قاطع طريق %%
النفس خزنة ملك والحزن قاطع طريق
والجروح يوجر عليه المسلم اليا أحزنه
وأنا من العام وأنا أشعر بيبسان ريـــق
يفرج سجيني مع عيني وأرد أسجـنــه
من بين طيات صدر شل ما لا يطيـق
لا جاع حزنه تعشى جروحه المزمنه
مجسم إنسان من داخل رمادة حريق
وقودها المغريات ونفسي المؤمنـــه
أحياناً أبكي من الخشيه لحد الشهيق
وأحياناً أقبل على الأذان ولا أذنـــه
ما عاد أنا أيّاي يالله لا تخلي عويق
عاقبته عيون روس مدلبحه وألسنه
كتل هوامش بشريـــه تنـــام وتفيـــق
رديان وحتى الردى بالضبط ما تتقنه
لكن على كل حال الطلق يبقى طليق
لو عاينته العيون وضدتـه الأزمنــــه
عذر السنافي معه والعذر حبله وثيق
لوحس رعبوبته وإلا جفا موطـــنه
رعبوبتي يا وجودي يا غلاك العتيـق
عنه مكان لقيتك فيــه عاما.. عـــنه
يوم الشجر صاير لوجهك مشجع فريق
من وين ما أفتر..تتغير معه الأمكنـه
للحين باقي بدربه من رحيقك رحيق
وللحين يتمتم حكينا العذب ويدندنـــه
يو إني أشر على صدري وعينك تويق
وأقول إنتي هنا..وتقولي أنت هنـــه
الهاء..في آخر كلماتك بصوت رقيق
يشطب على برمجة سمعي ويستوطنه
منتي بشر جعل من جابك ضحيه زريق
شارعك يحسب لك بـالأمتار يا مفتنـــه
إليا إنتصفيه يضيق وكل ماله يضيـق
كنك كوكايين..وأرصفه..خشم مدمنه
رعبوبتي ما خبرت انه تحرك طويق
شاعرك مجنون خلقه والشعر جننـــه
قولي لهم ينتهون ولا يطول ******
الميسره ميسـره والميمنـــه ميمنـــه
وقولي لهم للعراقه رأس صبي عريق
ياكــــم سر يعرفــــه بــس ما يعلــنــه
أتنوخذ البحر ولا أرسي بجال المضيق
والشي بالشي لا اعيبه ولا استحسنـــه
الاّ الرفيق إللي يستغل طيب الرفيق
هذي اللي ماهيب مقبوله ولا ممكنه
يا صاحبي كان لك مال الشقيق لشقيق
والحين جمّع بقايا ما مضى وأدفـــنه
ويا قلبي اللي وساويسك تنجس غريق
الله لا يصغّر إبليســــتك..ولا يلعنــــه
ماهو فخر في سنه تعرف لك مية صديق
الفخر؟ تتعلاف بصديق .. لميه سنـــه
ســـــعـــد علـــوش %% قـــــــاطــــع طـــريــــق %% 
النمط الخطي
