كيف الحال يا شباب وشبابات..عساكم بخير؟؟ والله انا ذاك اليوم وانا توني قايمه قلت والله وش حليلهم حبايبي منذو مبطي ما نزلت لهم موضوع او قصه <<ايه يا اغاثا كريستي لا انا ما اقلد اغاثا اقلد نانسي عجرم <<بدينا تضييع يا انسه هانم!! ما اطول عليكم وخلوني ادخل لكم في صلب الموضوع من حول سنتين تقريبا رحنا انا وبنات عماني للشرقيه..وكانوا بنات عمي راكبين معنا في السياره لان ابوهم ما قدر ياخذ اجازه المهم..مير قبل المهم خل اعرفكم ع الاسماء اللي اطلقتها عليهم (لو يدرون عنها اقل شي بيحكمون علي مؤبد مع اعمال شاقه) الكبيره بسميها فتحيه ..لان مالها دور كبير في القصه عشانها هاديه اللي تحتها على طول بسميها عمشى ..لانه مرجوجه وانا وياها لابقين على بعض ..يعني اذا اجتمعنا ..قولوا على الدنيا السلام واللي تحتهم عاد هذي في الابتدائي وشكل لها مستقبل زاهر في الهبال .. وبنسميها صفيه <<اسم سودانيه كانت في فصلي وانا ما احتاج لتعريف بس بغير اسمي من دجاجه الى شمّه ..عشان تكتمل عائلة نمر بن عدوان ..ما بقى لنا الا الخيمه والله.
في السياره: انا والبنات كلهم جالسين في الوسط واخواني الصغار مكحوتين في الخلف وامي وابوي قدام طبعا اول ما ركبنا الفرحه ماكانت واسعتنا ابد اول مره نسافر مع بعض ونطس للشرقيه من ايام كنت في الابتدائي وحدنا اذا تعدينا الرياض يودونا لذيك حقت الملك فيصل المخيمات ..عاد حنا نجمع ونقصر عشان نحس اننا في سفر المهم...عاد كل خمس دقايق داقن علينا اخوها يسئلنا وين وصلتوا ؟البيت فضى عليه الضعيف .. بس من جد عاد يقول عمشه ما ناقصكم الا نغمة طاش ماطاش حقت السفر لين سافروا في حلقة ابو هزار وابو نزار (عاد عرفتوها ) قلنا عاد ما بدهاش ويالله يا نغمه وطبعا كالعاد الكميرات في يدينا نصور لو النمل وهو يطير (تسذوبه صح؟) بس يعني صيغة مبالغه لان بجد الكميرا تمتلي الميموري حقتها في لحظه اذا صارت معنا..
وحنا في نص الطريق للشرقيه ..اتحفتنا صفيه بسؤال فقع بطونا من الضحك..قالت وهي مرتاعه: عمشه جبتي جوازاتنا؟؟ حنا طارت عيونا لا يكون البنت تحسبنا رايحين لتركيا ولى البوسنه؟؟ عمشه: ليه وشو له الجوازات وانا اختس ..؟؟ صفيه اجل وش لون ندخل الشرقيه؟؟ <<هي ما قد راحت الشرقيه الا وهي صغيره لا تلومونها ............عاد استلمناها الضعيفه وكملنا السيناريو ............. ابوي: يووووووووه وش لون نسيتوا الجوازات؟؟ الحين وش لون ندخل الحدود؟؟ ام شمّه جبتي جوازاتنا وجوازات العيال ؟؟ امي : ايه جبتها حتى جواز الشغاله جبناه!! صفيه وهي ضايق صدرها:طيب الحين وش لون ندخل؟؟ عمشه : انا ما قلت لس جيبي الجوازات وانتي سافهتني تتطالعين سبيس تون؟ صفيه : لا والله ما سمعتس؟ ياربيه وش نسوي؟ فتحيه: خلاص لا يضيق صدرس ندق على ابوي يعطي محمد (السواق) الجوازات ويلحقنا عند الحدود واذا خذيناها لحقنا عمي برجلينا لين نوصل للخبر <<حتى العاقله صارت تسذوبه انا: اسمعي لقيت فكره ازين خلي ابوس يرسل الجوازات عبر الفاكس او يرسلها رسايل وسائط لابوي !! فتحيه : طيب ما عندا فاكس؟؟ ولى صح في مكتب ابوي فاكس عمشه: طيب عمي هنا في سيارته ما ركب خط تلفون وش لون نحط الفاكس؟ ..................لحظة صمت.............. فتحيه : اصلن عمي عنده واسطه <<<يا ويلي ياوزير ابوي؟؟ ابوي: وهو ميت عليها من الضحك ..وش واسطاته وانا عمتس لوس بتدخلين جامعة الملك سعود ؟؟ لا خلاص وانا عمتس بيدخلونس غصب عنهم ..ولى اقول لين جينا نوصل للحدود بنحطتس في الشنطه ونوزيس عنهم .. فتحيه حست اننا نتريق عليها : لا تستهبلون علي امي: لا حبيبتي اصلن ما يحتاج عشان ندخل الشرقيه جوازات تراها داخل السعوديه . فتحيه واللي مدري وش لون نجحت في الجغرافيا: اهااااااااااا <<بدري !! ....................وكملنا الطريق ووقفنا عند البقاله عشان نشتري خرابيط واكل ...................... عمشه وفتحيه كانوا يشربون هليستون (بيره) وانا ما احب البيره حدي كاديه ازرق يوم خلصت فتحيه من بيرتها خذيت منها القاروره ..ليه؟؟؟ عشان اسوي دعاية باربيكان طبعا وتمسك عمشه الكميرا وتصور. انا: باربيكان هذي حياتي انا شمّه بنت ابوي ..وحنا في طريقنا للشرقيه شوفوا كيف الربيع والاشجار المزهره ..عاد تلف عمشه بالكميرا حولنا وتصور الصحراء اللي سبيتها وقلت اشجار مزهره<<ابوك يالاخراج!! انا: وحنا الحين وصلــ ... (ابوي قطع حبل افكاري وسكتني لانه كان يكلم ) عاد تفشلت وقلنا ستوب يا كميرا مانه (عشانها بنت) .. وكملنا طريقنا بهدوء غريب ما حسينا فيه من ثلاث ساعات ................ وصلنا للخبر ولله الحمد................ نزلنا اغراضنا ورتبنا كلش وكنا واصلين الساعه عشر الليل تقريبا عاد قال ابوي خل نروح للكورنيش نتمشى ونشم رطوبه (لانه ماكان فيه هواء ماكان فيه الا رطوبه تشق الخشم) ورحنا للكورنيش كلنا وكان فاضي (لاننا الوحيدين القراوى اللي طالعين في الرطوبه وذا الجو الحار) المهم ونلقى لكم ذيك القطوة المنسدحه ع الكرسي(مالقينا لنا كراسي ننثبر فيها وذي جالسه تتمغط عمتي) وطبعا كما جرت العاده صورنا ذا القطوه رحت انا وصقيقتي عمشه نتمشى ونتريق (مدري على مين لانه كان فاضي ..بس سبحان الله هوايه) وكنا نتمشى بس سبحان الله لقينا كائنات بشريه غيرنا ولقينا بزر راكب سيكل (مسكنا مع الايد اللي تعورنا) تذكرنا ايام المزرعه ووش لون كنا نشلح سياكل عيال عماني يوم كنا صغار ..بس الحين كبرنا وتغطينا وماعاد باقي الا العرس (حطوا تحتها عشرطعش خط) قلنا دامنا طفشانين ومحترين وحالتنا حاله خل نستعبط على ذا الوليد .. عمشه: احلىىىىىىىى يا كبتن ماجد <<مدري وش دخل ذا فيذا؟ انا: احلىىىىىىىىى يا توم كروز <<ماعلى الاولى شرهه عمشه: عطنا وجه يا حلو <<داخلين نغازل الظاهر انا: اقول اركدي الحين ينادي علينا الهيئه يقول يغازلوني <<مدري وش كنا نبي من الدنيا!! عمشه:ياخي عطني دوره <<طلع الصدق الولد: اقول انقلعي فيذاك بس انتي ووجهتس ...............فقينا خششنا من الرد الذي يسم البدن ..يعنبوا بليسه ذا التسلب................. عمشه: يعني منتب مخلينا نلعب؟؟ الولد: معصي انا: معصين عصاك اجل من الصبح نتغزل فيك عشان ايش لسواد عيونك ولى لسواد رجليك <<من جد كان وصخ الله يقرفه الولد : اقول انقلعوا بس <<اكتشفت ان اسلوبه مره سوقي وراح وخلانا عاد وحنا نمشي لقينا مراجيح وزحاليق وتمنينا الشباب يعود يوماً <<وش عندها ام خمسين سنه؟؟ طبعا ولله الحمد ما نخلي في نفسنا شي نتمناه ورحنا وتمرجحنا انا طبعا بعباتي ومتغطيه وكاشخه واتمرجح وهي تصورني ..وسوينا فيديو هيفاء وهبي بس اسلامي كان معروض على قناة المجد او اقرأ .......ثمن رجعنا عاد للسياره بنرجع خلاص ..الا نلقى ابوي جاينا ومعاه استشوار!! كلنا طارت عيونا ..وش نبي بالستشوار يا طويل العمر؟ ابوي : وش اسوي بذا الهندي نشب في حلقي الا تشتري من عندي ..قال لي ان ذا الاستشوار بميه وخمسين...كاسرته ابيه يطس عني ..وصلت لين خمسين ريال ووافق .. رحمته عاد وشريته حنا : فاطسين ضحك والله ان ابوي اطلق من ام سعيد في المكاسر يوم جينا نركب ..(هنا المشكله) .. انا كنت لابسه بنطلون جنز وفيه رطوبه ؟؟يعني وش لون بجلس؟؟ مره مع الرطوبه يالله جلست والثانيه بعد يالله جلست ورحنا طلبنا عشاء وكنا نتطنز انا وعموش (بعد ادلعها) على الي في الطعم اللي كاشخه وداجتن لها مكياج والثانيه عباتها معفطه عاد يوم شفنا ام عباة قلنا لوني مكانها ما طلعت وانا عباتي كذا معفطه ورحنا بعدها للسيفوي وشريناخرابيط (شيبسات او ايسكريمات او اندومي او .....الخ) وقمنا نخمخم وما خلينا شي نفسنا فيه ويوم جينا نطلع وقفنا عند الباب..فيه واحد قهرني التسلب يغازلنا وابوي معنا يعني وين الاحترام!!! مشيناها له ورحنا للشقه وتحممنا وحسينا اننا اوادم الحين .................................................. .................................................. .................................................. .................................................. .................................................. .................................................. .................................................. .................................................. .................................................. ...^ حسيت انه تصطير دفتر عربي !!
....................اليوم الثاني.................... طبعا قمنا بعد ماكنا سهرانين ع المسلسل المكسيكي روبي .. يوم جا حول العصر وصلت عمتي من الشرقيه بعد هي (كملت الفله) جايه هي وبناتها الثلاث وكلهم حول اعمارنا وسكنوا في الشقه اللي جمبنا وجا اخوي هو وزوجته من البحرين وسكن معنا ..يعني الشقه ابو الوناسه صايره مليانه وعمتي وبناتها يجون عندنا بس في حزة النوم يروحون لشقتهم ... .................................................. .................................................. .................................................. .................................................. .................................................. .................................................. .................................................. .................................................. .................................................. ... ....................اليوم الثالث.................... قومونا الصباح الباكري عشان نروح للسوق ما يبون زحمه ..طقاق ويالله قمنا ورحنا وعباياتنا معفطه <شفتوا ان الهزوى بلوى وركبنا كلنا في الباترول حق ابوي ..وكنا انا وامي وبنات عمي ثلاث وعمتي وبناتها اربع يعني جيب طقاقات فيه تسع حريم وماناقصنا الا الطيران..وكنا مخلين البزران عند زوج عمتي صح نسيت اسمي بنات عمتي!! ..الكبيره متزوجه وعندها بزر اسمها سوير اللي تحتها عازبه وماعندها بزر (احلفي) اسمها رفحه <<ياويلي ع الاسم الصغيره في المتوسط واسمها نوير نراجع الاسامي مره ثانيه عشان ما تنسون..انا شمّه ..الهاديه فتحيه..المصرقعه عمشه..الصغيره ام الجوازات صفيه.. المهم يوم وصلنا للسوق الراشد ونزلنا في شباب شافونا قالوا ذولا جايين في باص مدرس؟؟ <<ماينلامون عاد كنا رايحين للسوق لغرض سعة الصدر والاستهبال اكثر من انه لغرض التسوق والله فالينها وما علينا من احد لاننا جايين نوسع صدورنا .. ابوي وامي راحوا لحالهم وحنا عمتي جت معنا عاد كيف ننادي بعض فيذاك ؟؟ ننادي اسم البنت واسم ابوها؟؟لا تسألون وش الحكمه من هالحركه بس حركة عباطه اقرب شي للتفسير عمشه بنت سعد تعالي شوفي ذا التي شيرت <مثقفين عاد لا يغركم الاسلوب نوييييير بنت فهد تعالي بسرعه لا يفوتس ..هذي لايقه عليس قسم بالله نوير:لا والله يا صفيه بنت سعد ماظني تنفع لي هذي يبي لها ناس سمان طبعا اللي في المحل يحسبونا قراوى اول مره يروحون لسوق!! عاد دخلنا السواني قلنا عاد خلوكم ذوق شوي الله يعافيكم .. والله حنا ذوق بس اذا انهبلنا انهبلنا..وحنا نتفرج ع الملابس فجأه نسمع شي يقول تيكتاكتاكتاك كلنا التفتنا لا نكون كسرنا شي ولى شي سقط سهوا؟؟ صارت سوير انقطعت شنطتها كانت اليدي حقتها خرز عشان كذا طلع ذا الصوت فجاه كلنا نزلنا تحت نجمع ذا الخرز حسنا ابو ذا المحل حتى اللي يشتغلون تحمسوا معنا وقاموا يجمعون في ذا الخرز ... عاد يوم جينا نحاسب على التي شيرت اللي اخذته رفحه تجمعنا كلنا على الكاشير قلنا خلاص عاد عقلنا فتره طويله خل نستهبل شوي الكاشير: الحساب199 رفحه: الحين ورى ما تخلونها ميتين وتريحونا؟ انا: لا يالخبله ذا الريال تشترين به كيس صامولي..صدق انس بطرانه!! نوير: لا حنا عندنا في البديعه (ولايه من ولايات الرياض) الكيس بنص ريال يعني ذا الريال يجيب لنا كيسين حقت خمس ايام قدام انا: يختي بنروح نعيش عندكم والله انكم رخيصين ويسون عندكم تخفيضات زينه الكاشير فاطس علينا ضحك وحنا نتشاور ونفصفص السالفه ونتناقش في قضية خبز الصامولي عاد تعرفونا عيالنا ما ينعطون وجه ..وهذا اللي كل يوم اكتشفه زياده عن اليوم الثاني قام عاد الكاشير يتميلح ويستظرف نفسه ..انا حامت تسبدي وقلت خلاص بروح لمحل ثاني من يخاويني <<طلعت بر يوم انهم يخاوونك؟؟ جت معي عمشه ونوير ..دخلنا محل يبيع فيه فلبيني (عاد انا موتي الفلبن ..احسهم براءه وربي يهبلون) عموشه تخصص انقليش وانا انقليزيتي كويسه الحمد لله ..قلنا خل نهبل بذا الفلبيني يعننا ما نعرف نحكي انقليش..قالت قدام (وافق شنٌ طبقه) لقينا بنطلون مهوب شين والله .. قررنا نستهبل بعذر ذا البنطلون عمشه : كويزمي <اكسكيوزمي انا : وخقيت مع الكلمه الفلبيني: يس؟ عموش: هاو مشت ذيس ااااا ذيس اااا<يعنني ما عرفت الكلمه انا : ذيس بنتلون <<يقالك بنطلون بالانقلش بنتلون عموش: كفو يا امدادات انا : في رسم الخدمه يالاخت الفلبيني وهو حاس اننا ما نعرف نحكي ويالله نعرف يس ونو: ذيس از فور هاندري ريالز <<وهو ياشر بيده يقالك بنفهم انا : طيب كويزمي لو سمحت الفلبيني : يس؟ انا : از فيه انذر كولور <بس لا تغركم الكلمه ترى نطقها موب صاحي الفلبيني : يس ذير از وايت اند بلاك اند بينك انا: يا حظكم عندكم بينك بانثر؟؟ الفلبيني : سوري؟ عموش ولقت شنطه عجبتها عاد حاكته زي الناس واحسه بيقول يلعن وجيهكم ورى ما تكلمتوا زي الناس من اول؟؟ انا : اقول عموش مشينا انا واختس خل نروح لمحل ثاني عموش : مشينا عموش : نويييير بنت فهد وينس؟ نوير لاهيه مع ذا الخلاقين تدور شي للعيد : يالله جيت رحنا لمحل الدو ولقينا شنطة سوير اللي انقطعت ..وصار سبب الانقطاع هو انه ماليه شنطتها الله يقطع بليسها مابقى شي مهوب في الشنطه؟؟ رضاعة ولدها وحليب ولدها وغيار لولدها وبامبرز لولدها وكل هذا وولدها مهوب معنا ...يعني زحمه ولى ضيق؟؟ المهم يوم لقينا الشنطه قلنا خل نستعبط على راعي المحل كنا ناوين نقول له ان صناعتكم مهيب زينه حتى شوفوا الشنطه انقطعت..يوم شفنا لينه سوي ومعصب بعد ..يعني ما ينفع ابد المهم رقينا فوق عقب ماخلصنا الدور الارضي..كلنا رقينا مع الدرج المتحرك وصافين ثنتين ثنتين ..يعني بجد كننا في مدرسه ومسوين لنا رحله ميدانيه وحنا ماشين ومسفحين وفجاه من اللي في الطبقات اللي قدام وقفت وكلنا صقعنا في بعض انا من ذا التنحه اللي وقفت بدون سابق انذار؟؟ مدري الا فجاه دخلوا محل واطالع الا فيه طيران..قلت بعذرهم ما قدروا يقامون الاغراءات ذا الطقاقات واشوف المحل كان متر في متر وتارسه اغراض وبضايع ..وكل وحده تستلم طار وتخبط شوي فيه ... الرجال ارتاع وش ذا الاستعمار اللي صار فجأه؟؟ عاد استحينا على وجيهنا وطلعنا من المحل لاننا شفنا الرجال شوي تضايق (الا واجد) وتذكرت وحده من صحباتي كانت قايله انهم يوم راحوا لاسواق الراشد دخلوا محل بيانو <<<فرق السماء عن الارض!! عاد رجعنا للشقه ورحنا بعدها للهاف مون يوم برد الجو شوي
.................................................. .................................................. .................................................. .................................................. .................................................. .................................................. .................................................. .................................................. .................................................. ... ....................اليوم الرابع...................... كنا سهرانين انا وبنات عمي عمشه وفتحيه على روبي كالعاده يوم خلصت طفشنا قلنا خل نروح بس لشقة عمتي ودقينا على رفحه وصارت قايمه وقلنا لها اننا بنجي الحين لشقتكم افتحوا لنا الباب وعاد مسمين الشارع شارعنا تقاطع شارع ال فهد ومعتبرين الشقق حقتنا يا حليلنا ..بس من جد كل مارحنا للشرقيه سكنا فيها يعني حنا زباين عندهم طلعت انا وعموش وفتحيه ..بس تحسبونا لبسنا عبايات ولى اجله؟؟لا حطينا فوطة تحمم فوق روسنا وطلعنا حنا ببجايمنا <<وربي حلقة طاش ماطاش يوم وصلنا لشقتهم ودخلنا لقينا سوير ورفحه قايمين بس نوير خامده.. فمن واجبنا اننا نصحيها ..طبعا قومنا تقويمه تروع الجن وقامت الضعيفه وقمنا نطل ع الشارع ..كان يوسع الصدر الشمس توها بتشرق <<شربناها مويه<<ظرافه بجد لا صدق تو الشمس بتظهر كان المنظر شاعري ما اعطيناه وجه وشفنا واحد رجال يسوي رياضه..استغربنا هالمنظر لانه ما يتكرر في العمر مرتين ولقينا فلبيني يمشي رجليه شكله بيطس للعمل..قمنا نناديه حنّا: ماكدونالدز <<حاطين في بالنا كل الفلبينيين يشتغلون في ماك هو: رفع راسه فوق وابتسم درى اننا مناب صاحين حنّا : وير ار يو ول تطس له؟ <<كالعاده الانقليزي المكسر هو: رفع راسه وسى لنا باي وراح انا خقيت معه..يا حبيله مؤدب والله لو انه هندي ان يرقى لنا في الشقه .. عاد جا الليل ورحنا مره ثانيه للهاف مون وجا عمي الثاني من الرياض <<بدري وركبنا لنش وقمنا نستهبل لان اللي يسوق كان هندي ..ونتطنز وماخذين راحتنا وفجاه يوم حكى صار سعودي ..عاد هنا كلينا تبن وانتبهنا لحكينا ..عاد يقول لاخوي قول لهم اللي ما تعرف تسبح ترجع ورى ..وين نرجع ورى فيه وانا اختك اللنش ما بقى نفر فينا مهوب فيه !!
.................................................. .................................................. .................................................. .................................................. .................................................. .................................................. .................................................. .................................................. .................................................. ... ................. اليوم الخامس..........[ اخر يوم ]
رحنا للظهران مول وكان توه فاتح طبعا رحنا الصباح يوم رجعنا اكتشفنا ان في الشقق هذي غرفة العاب الكترونيه كان فيها هوكي (عشقي الاول والاخير) وبلياردوا وخرابيط ثانيه المهم عاد قررنا ان تكون ختامها مسك وقلنا خلاص مابدهاش لازم نلعب ونستحل الغرفه كل ابوها احنا يالبنات واخوي وولد عمي ..طبعا طلعنا فيها خسرانيين وللاسف ..انا مع عموش وخسرت (لكل حصان كبوه) واخوي مع مرته وخسر (لكل كبوه حصان) ورجعنا للرياض سالمين غانمين ولله الحمد ..وكل ما جت اجازه ننشب في حلوق عماني ودونا وودونا والحمد لله كالعاده يضربون بطلبتنا عرض الحائط (بقناعه)
::::ملاحظات::::: 1-الاسامي من نسج الخيال والله مو من حلاتها بس ما ابي اشوه سمعتهم اخاف ما يعرسون ثمن يأنبني ظميري 2- ترى هذي الاحداث حقيقيه ميه بالميه يعني ما الفت فيها شي .. بس فيه شوية مبالغات بسيطه ما تذكر 3-ارحب باي تساؤلات او تعليقات عندكم ودكم تسدحونها عندي بصدرن رحب فلا تستحون وتخلون شيّن في خاطركم 4-اعذروني والله مالي خلق ابطح لكم اختصارات 5-يقول الشاعر:
اللي ما يعرف الصقر يمد رجوله على قد لحافه ..عشان تسذا حبايبي لازم نقتصد في استخدام الماء.. ونسرع بشويش عشان الاشجار ما تخرب
مغامرتي وعماني في ولاية الشرقيه ستيت 
.....الخ) وقمنا نخمخم وما خلينا شي نفسنا فيه ويوم جينا نطلع وقفنا عند الباب..فيه واحد قهرني التسلب يغازلنا وابوي معنا يعني وين الاحترام!!!
